10.07.2023 | 17:08
Бөлісу:
Алматы қаласының мергендері VІ жазғы Спартакиадада топ жарды
Бүгін Шымкент қаласында нысана көздеуден ҚР-ның VI жазғы Спартакиадасы аяқталды.
Бір аптаға созылған бәсекеде 27 бағдарламада жүлде сарапқа салынды. Оның 12-сі жекелей, 12-сі командалық сайыста, қалған 3 медаль жиынтығы аралас жұптар арасында өз иесін тапты. Барлығы Шымкенттегі бәсекеге 9 өңірден 138 спортшы жиналды.
Бүгінгі 2 жүлде жалпы есептегі жеңімпазды анықтап берді. Жылжымалы нысана көздеу мен 10 метрден пневматикалық тапаншамен аралас жұптық сында Алматы қаласы чемпион атанып, жалпы есепте 1-орын алды. Олардың еншісінде 13 алтын, 16 күміс пен 5 қола медаль бар. Ал Шымкент қаласы (13 алтын, 6 күміс, 8 қола) 2-ші болса, үздік үштікті Жамбыл облысы 1 алтын, 4 қоламен түйіндеді.
«Осы Спартакиада барысындағы ең қиын финал бүгін болды. Іріктеуде 586 ұпай жинадым. Бұл менің үздік көрсеткішім дей алмаймын. Бұдан көп балл жинаған кездер бар. Финал мен үшін сәтсіз басталды. Бірақ ортасына қарай бар шеберлігімді көрсете бастадым. Қарсыластарымның алдын орап жеңіске жеткеніме қуаныштымын. Осы сәт үшін біз ұзақ дайындаламыз. Енді шетелдегі жарыстардан жүлделі оралуға барымды саламын»,- деді Ұлттық құрама спортшысы Ислам Сатпаев.
«Бұл жарыста бар мүмкіндігімнің 60 пайызын көрсеттім деп ойлаймын. Нәтижеме көңілім толады. Бүгін 5-ші жүлдемді жеңіп алдым. Келесі жарысқа дейін дайындалуға көп уақыт жоқ. Алда жастар арасындағы әлем чемпионаты келе жатыр. Сосын, Азия ойындарында жақсы нәтиже көрсетуіміз керек»,-деді Алматы қаласының спортшысы Александра Садуакасова.
Осымен Олимпиада бағдарламасына кіретін 25 спорт түрінен VI жазғы Спартакиада мәреге жетті. Нысана көздеуден соң 20 өңірдің ішінде жалпы есепте анау айтқандай өзгеріс болған жоқ. Қазір Алматы қаласы көш бастап келе жатыр. Ал одан кейінгі сатыда Шымкент қаласы тұрса, Қарағанды облысы 3-сатыны Астана қаласына бермей, өзінде сақтап қалды.
Еске сала кетейік, 4 жыл бұрын нысана көздеуден V жазғы Спартакиада осы Шымкент қаласында өтіп, жарыс қожайындары топ жарған. Ал жалпы есепте 2-орынды Алматы қаласы алған.
Жаңалықтардан қапы қалмау үшін бізге жазылыңыз:
Таңдаулы жаңалықтар
Барлық жаңалық
Негізгі құрам Бакудағы Әлем Кубогына аттанды
Елизавета Безрукова әлем рекордын тіркеді
Валерий Рахымжан Әлем Кубогында 5-орын алды