27.04.2023 | 20:26
Бөлісу:
Жүйелі әдістеме, насихат және әлеуметтік лифт – қазіргі спорттағы басты мәселелер
ҚР Мәдениет және спорт министрлігінің спорт және дене шынықтыру істері комитеті соңғы қысқы маусымды қорытындылауды бастады. Комитет төрағасы Ербол Мырзабосынов, төраға орынбасары Айгүл Бектенова және Спортты дамыту дирекциясы директорының орынбасарлары Азамат Имашев пен Сержан Жұмабеков қысқы олимпиадалық спорт түрлерінен Қазақстан ұлттық құрама бас жаттықтырушыларының қорытынды есебін тыңдауда.
Бірінші күні биатлон, керлинг, мәнерлеп сырғанау, конькимен жүгіру, шорт-трек және фристайл (могул) командаларының бас бапкерлері есеп берді. Өткен маусымда шорт-трек пен фристайл спортындағы нәтижелер қуантты. Өйткені, Денис Никиша 500 метрлік қашықтықта Әлем Кубогының жалпы есебіменде топ жарса, Павел Колмаков Әлем Кубогының финалдық кезеңінде күміс жүлдегер атанды.
«Біз өткен маусымды қорытындылап қана қоймай, кеткен кемшіліктерді ескере отырып, алдағы уақытта жұмысты дұрыс жолға қою жолдарын қарастырамыз. Біріншіден, спортты дамытудың нақты жүйесін құруымыз қажет. Бұл жерде федерацияларға айтарым – спортшы дайындаудың қысқа мерзімдік емес, ұзақ уақытқа жоспарланған әдістемесін ойлап табу керек. Сонымен қатар, виза рәсімдеу, жарақат алу қаупі жоғары спорт түрлеріндегі сақтандыру, құрал-жабдық сатып алуды жеңілдету сияқты мәселелер тез шешімін табуы қажет. Өкінішке орай, кейде спортшылар карьерасын аяқтағаннан кейін ешкімге керек болмай қалып жатады. Бұл дұрыс емес. Олардың жиған тәжірибесін ел спортының игілігіне пайдалану керек», - деді Ербол Мырзабосынов.
ҚР Мәдениет және спорт министрлігінің спорт және дене шынықтыру істері комитеті халықаралық және республикалық деңгейдегі басты жарыстарды Бұқаралық ақпарат құралдарында трансляция түрінде көрсетуді қолға алмақшы.
Есеп берудің екінші күні фристайл (акробатика), шаңғы жарысы, сноуборд, тау шаңғысы және шаңғы қоссайысы өкілдерінің баяндамалары тыңдалады.
Жаңалықтардан қапы қалмау үшін бізге жазылыңыз:
Таңдаулы жаңалықтар
Барлық жаңалық
