21.09.2023 | 18:22
Бөлісу:
Ханчжоудағы Азиада қалашығында Қазақстан туын көтеру рәсімі өтті
Бүгін Ханчжоу қаласында Қазақстан туын көтеру рәсімі салтанатты түрде өтті, деп хабарлайды ҚР Туризм және спорт министрлігі Спортты дамыту дирекциясының баспасөз қызметі.
Бұл іс-шара қазақстандық спорт делегациясының Азия ойындарына ресми түрде келгенін білдіреді. ҚР ҰОК Спорт дирекциясының директоры Елсияр Қанағатов спортшыларды ХІХ Азия ойындарында ел намысын лайықты қорғау керектігін жеткізді.
«Жарысты ұйымдастыру жоғары деңгейде, Олимпиада ойындарынан кем түспейді. Қазақстандық делегацияның бір бөлігі Қытайға келіп, атлеттер ауылына орналасты. Өздеріңіз білесіздер, Азия ойындары біздің құрама үшін өте маңызды. Өйткені мұнда медальдар ғана емес, бірнеше спорт түрінен Олимпиада лицензиялары да ойналады. Спортшыларымыз жақсы өнер көрсетеді деп үміттенеміз», - деді Елсияр Қанағатов ресми рәсімнен кейін.
ҚР ТСМ Спорт және дене шынықтыру істері комитеті Спортты дамыту дирекциясының директоры Оралбай Жақсымбетов те спортшыларға сәттілік тілеп, олардың барлығына құрлықтық жарысқа сапалы дайындалу үшін барлық жағдай жасалғанын атап өтті.
«Азия ойындары – бұл құрлықтық Олимпиада. Мұнда сары құрлықтың үздік спортшылары жиналады. Біз қалашықта спортшылармен бірге тұрып, олардың еш нәрсеге мұқтаж болмауын жеке бақылаудамыз. Ұлттық құрама толықтай жабдықталған. Ойындарға дайындық біз ойлағандай өтті. Кедергілер жоқ. Командамызға сәттілік пен жеңістер тілеймін», - деді Оралбай Жақсымбетов.
Салтанатты шараға бокстан Қазақстан құрамасының үздіктерінің бірі Сәкен Бибосынов қатысты. Спортшы марапаттау рәсімі кезінде көк байрағымыздың тағы желбіреуі үшін қолдан келгеннің бәрін жасауға уәде берді.
«Бұл мен үшін бірінші Азия ойындары. Біз қатысатын спорт түрінен олимпиадалық лицензиялар сарапқа салынады. Олар тек финалистерге беріледі. Сондықтан бәсекелестік өте жоғары болады. Мен тек жоғары нәтижеге жетуді мақсат етемін. Ал біздің барлық боксшылар мұнда жеңіс пен лицензия үшін келді. Жетістікке жететінімізге сенеміз», – дейді спортшы.
Жазғы Азия ойындарының ресми ашылу салтанаты 23 қыркүйекте өтеді. Қазақстан құрамасы сапында 524 спортшы бақ сынайды. Олар 40 спорт түрінің 30 түрі бойынша өнер көрсетеді. Отандық спортшылар 44 бағдарламада жүлделі орындарға таласып, 305 медаль жиынтығын сарапқа салады. Жалпы Азия ойындарында 61 дисциплина бойынша барлығы 481 медаль жиынтығы сарапқа салынады.
Жаңалықтардан қапы қалмау үшін бізге жазылыңыз:
