30.05.2023 | 22:31
Бөлісу:
Таразда VI жазғы Cпартакиаданың алауы тұтанды
Бүгін Тараз қаласында ҚР VI жазғы Cпартакиадасының салтанатты ашылуы өтті. Орталық стадионда өткен ауқымды іс-шараға ҚР Мәдениет және спорт министрі Асхат Оралов, Жамбыл облысының әкімі Нұржан Нұржігітов, сала ардагерлері мен қала тұрғындары қатысты.
Тараздың терең тарихынан сыр шертетін «Көне Тараз» бейнеролигі, «Бабалар рухы» дауылпаздар қойылымдары жиналғандарға ерекше әсер сыйлады. Осыдан кейін ортаға Спартакиаданың туы шығарылды. Асхат Оралов төрт жылда бір өтетін бәсекенің маңызын атап өтіп, барша жиналғандарды құттықтап, қатысушыларға сәттілік тіледі. Сондай-ақ, министр Мемлекет басшысының қолдауымен бүгінде ел спортының қарқынды дамып келе жатқанын, ол үшін барлық жағдай жасала беретінін атап өтті.
«Қазақстан Республикасының Спартакиадасы төрт жылда бір рет өткізіледі. Бүгінгі жарысқа еліміздің барлық өңірінен 1000-нан астам спортшы қатысып отыр. Бұл байрақты бәсеке ел тарихындағы елеулі оқиға. Спартакиаданың мақсаты – жазғы спорт түрлері бойынша ұлттық құрама командаларына ең мықты спортшыларды жасақтау және халықаралық ресми жарыстарға, оның ішінде Парижде өтетін 2024 жылғы жазғы Олимпиадаға лицензиялық жарыстарға қатысуға үміткерлерді анықтау.
Өздеріңіз білесіздер, елімізде жастардың спортпен және дене шынықтырумен айналысуы үшін барлық жағдай жасалып, Президенттің тікелей тапсырмаларымен қолдау тауып келеді. Соның нәтижесінде, ел спортшылары небір халықаралық дүбірлі додаларда топ жарып, ұлт абыройын асқақтатып жүр. Олар өскелең ұрпаққа үлгі-өнеге болып, жастарды жарқын жеңістерге жетелейді. Осы мүмкіндікті пайдалана отырып, Спартакиаданың өткізуіне ерекше қолдау білдіргендері үшін Жамбыл облысының әкімдігіне, тұрғындарына зор алғысымды білдіремін»,-деді Асхат Оралов.
Министр жақында ғана Ташкент қаласында өткен бокстан әлем чемпионатында жеңіске жеткен спортшылардың жеке бапкерлеріне Қазақстан Республикасының Президенті Қасым-Жомарт Тоқаевтың Құрмет грамотасын табыстады.
Ал Жамбыл облысының әкімі Нұржан Нұржігітов төрт жылда бір өтетін жарыстың салтанатты ашылуы киелі Тараз төрінде өтуі мерейлі мәртебе екендігін жеткізді.
«Спорт – денсаулықтың кепілі, достықтың берік тұтқасы. Дені сау жастарымыз – егемен еліміздің ертеңгі тірегі, тұтқасы! Бұл бағытта өңірімізде көптеген ауқымды жарыстар ұйымдастырылып келеді. Бүгінгі 4 жылда бір өтетін дәстүрлі Спартакиаданың мақсаты – бұқаралық спортты дамыту, салауатты өмір салтын қалыптастыру, дене шынықтыру мен спортты насихаттау. Спартакиаданың ашылу салтанатының киелі Жамбыл жерінде өтуі біз үшін зор мақтаныш, мерейлі мәртебе. Тараз топырағы – талай талантты спортшылардың томағасын сыпырып, түлеткен қасиеттi мекен. Бұл тұрғыдан біз Олимпиада жұлдыздарымен мақтана аламыз, олардың жеңісті жолы – жас ұрпаққа үлгі. Бүгінгі іс-шараға қатысушы барлық спортшы мен жаттықтырушыға сәттілік тілеймін»,-дей келе облыс әкімі Спартакиаданы ашық деп жариялады.
Бұдан соң Спартакиаданың алауы жағылып, төреші, спортшы, жаттықтырушылардың ант беру рәсімі өтті. Салтанатты іс-шара эстрада жұлдыздарының және жергілікті өнерпаздардың қатысуымен концертке және мерекелік отшашуға ұласты.
Жаңалықтардан қапы қалмау үшін бізге жазылыңыз:
Таңдаулы жаңалықтар
Барлық жаңалық
