07.10.2023 | 16:12
Бөлісу:
Данияр Юлдашев Азия ойындарының күміс жүлдегері атанды
WKF каратэден Ұлттық құрама спортшысы Данияр Юлдашев Ханчжоуда өтіп жатқан жазғы Азия ойындарында күміс медальге ие болды, деп хабарлайды ҚР Туризм және спорт министрлігі Спортты дамыту дирекциясының баспасөз қызметі.
Кумите бағдарламасында 84 кг дейінгі салмағықтағы үздікті Данияр Юлдашев пен Мұхаммад Ариф Афифуд бин әл-Малик анықтады. Тартысқа толық жекпе-жекте Малайзия спортшысы басым түсті.
Данияр бүгін татамиге 3 мәрте шықты. Әуелі іріктеуде Теерапаттан (Таиланд), сосын ширек финалда Тайбэй атлеті Вэй Чен Удан, жартылай финалда Иордания өкілі Мұхаммед әл-Жафариден басым түсті.
Айта кетейік, Данияр 2018 жылы Джакартада өткен жазғы Азиадада қола медаль жеңіп алған. Сондай-ақ ол – әлем чемпионатының қола, Премьер-лига бәсекелерінің бірнеше дүркін жүлдегері. Азия чемпионатында 2 алтын, 2 күміс пен 2 қола жүлдеге қол жеткізген.
Қазір Қазақстан делегациясының еншісінде барлығы 73 медаль – 9 алтын, 20 күміс пен 44 қола бар. ХІХ Азиада ертең мәресіне жетеді.
Жаңалықтардан қапы қалмау үшін бізге жазылыңыз:
Таңдаулы жаңалықтар
Барлық жаңалық
Каратэден ел чемпионатында БҚО жалпы есепте 1-орын алды