22.01.2023 | invalid
Бөлісу:
Спортшылардың психологиялық дайындығына арналған конференция аяқталды
Астанада Спортты дамыту дирекциясының қолдауымен спорт психологиясына арналған «Qadam Hub» атты конференция өтті. Биыл алғаш өткен іс-шараға Әзірбайжан мемлекеттік спорт және дене шынықтыру академиясының спорт психологиясы бойынша окытушысы, психолог Нармин Ахмедзаде арнайы келіп, өзінің тәжірибесін ортаға салды. Конференция мақсаты – спортшылардың тұлғасын жан жақты дамыту, олардың жалпы және психологиялық мәдениетін көтеру.
Жиынға қатысу үшін 150-ден астам адам тіркелген. Олардың арасында бапкерлер, спортшылар мен құрама дәрігерлері сынды сала қызметкерлері бар.
«Былтыр ҚР Мәдениет және спорт министрлігінің Спорт және дене шынықтыру істері комитетінің Спортты дамыту дирекциясына федерацияның бас бапкерлері есеп берген болатын. Отырыста алдағы жылға арналған жоспарлар талқыланып, отандық спортқа психология саласы жетіспейтіні белгілі болды. Болашақта бұл жұмыс тығыз және жемісті жүргізілуі керек. Биыл бізді 6 кешенді жарыс күтіп тұр, олардың ішінде ең бастысы Қытайдағы жазғы Азия ойындары. Біздің бүгінгі арнайы қонағымыздың келуі Париж-2024 Олимпиадасының дайындығына зор ықпал тигізеді», - деді Спортты дамыту дирекциясының директоры Оралбай Жақсымбетов.
Екі күнге созылған бас қосу барысында жарыс кезінде атлеттерді қалпына келтіру, психология негіздеріне арналған заманауи әдістер туралы әңгіме өрбіді.
Айта кетейік, конференция соңында жиынның модераторы келген қонақтар мен баяндамашыларға алғысын білдірді. Болашақта бірлесіп атқаратын жұмыстарға ұсыныстар қарастырылып, ортақ шешімдер нақтыланды. Сондай-ақ алғаш рет өткізілген бұл іс-шара алдағы уақытта одан әрі жанданып, жалғасын таппақ.
Жаңалықтардан қапы қалмау үшін бізге жазылыңыз:
Таңдаулы жаңалықтар
Барлық жаңалық
